विराटनगर । आन्दोलनका नाममा निजी क्षेत्र लक्षित तोडफोड र आगजनीका घटनाले देशको लगानी वातावरण गम्भीर रूपमा प्रभावित हुँदै गएको भन्दै उद्योगी व्यवसायीहरूले चिन्ता व्यक्त गरेका छन् । यस्ता गतिविधिले लगानीकर्ताको मनोबल कमजोर बनाउँदै रोजगारी सिर्जना र आर्थिक स्थायित्वमै प्रश्न उठाएको उनीहरूको भनाइ छ ।
नेपाल उद्योग वाणिज्य महासंघ कोशी प्रदेशको समन्वयमा उद्योग संगठन मोरङद्वारा आयोजित ‘निजी क्षेत्र प्रश्न, पहिचान र प्रतिबद्धता’ विषयक कार्यक्रममा सहभागी वक्ताहरूले निजी क्षेत्रलाई असुरक्षित बनाउने प्रवृत्तिले दीर्घकालीन आर्थिक विकास अवरुद्ध हुने चेतावनी दिएका हुन् ।
उद्योग संगठन मोरङका अध्यक्ष नन्दकिशोर राठीले हरेक आन्दोलनमा उद्योग, व्यापारिक प्रतिष्ठान र निजी सम्पत्तिमाथि योजनाबद्ध आक्रमण हुने गरेको बताए । सामाजिक सञ्जालमार्फत निजी क्षेत्रविरुद्ध फैलाइने भ्रामक र उत्तेजक सूचनाले लगानीलाई अपराधका रूपमा चित्रण गर्ने गलत भाष्य निर्माण भइरहेको उनले उल्लेख गरे ।
राष्ट्रिय व्यवसायिक पहलका अध्यक्ष कुशकुमार जोशीले कर तिरेर, कानुन पालना गरेर आर्थिक विकासमा योगदान दिँदा पनि निजी क्षेत्रप्रति समाजको दृष्टिकोण सकारात्मक बन्न नसकेकोमा चिन्ता व्यक्त गरे । नकारात्मक भाष्यकै कारण उद्योग–व्यवसायमैत्री वातावरण दिनप्रतिदिन कमजोर बन्दै गएको उनको भनाइ थियो ।
कार्यक्रममा बोल्दै पूर्व गभर्नर डा. चिरञ्जीवी नेपालले निजी क्षेत्र जोखिम वहन गर्ने र मेहनती क्षेत्र भएको उल्लेख गर्दै यसको घट्दो मनोबल उकास्न सरकार र सरोकारवालाबीच सहकार्य अपरिहार्य रहेको बताए । राज्यका नीतिमा स्थिरता र कानुनको निष्पक्ष कार्यान्वयन निजी क्षेत्रको प्रमुख अपेक्षा भएको उनले स्पष्ट पारे ।
वक्ताहरूले निजी क्षेत्र कुनै व्यक्ति वा वर्गको नभई राष्ट्रिय अर्थतन्त्रको मेरुदण्ड भएकाले यसप्रति सम्मान, सुरक्षा र भरोसा आवश्यक रहेकोमा जोड दिएका थिए ।
