काठमाडौं । विश्वप्रसिद्ध अमेरिकी अटो निर्माता कम्पनी फोर्डले आफ्ना लोकप्रिय मोडलहरूमा आगलागीको सम्भावित जोखिम देखिएपछि उत्तर अमेरिकाभर ३ लाखभन्दा बढी सवारी साधन बजारबाट फिर्ता (रिकल) बोलाउने निर्णय गरेको छ ।
अमेरिकी संघीय नियामक निकाय नेशनल हाइवे ट्राफिक सेफ्टी एडमिनिस्ट्रेशन (एनएचटीएसए) का अनुसार अमेरिकामा मात्रै करिब १ लाख १९ हजार सवारी साधन प्रत्यक्ष रूपमा प्रभावित भएका छन् । समस्या फोर्डका चर्चित मोडलहरू एक्सप्लोरर, फोकस र एस्केपमा देखिएको जनाइएको छ ।
के हो समस्या ?
फोर्डका अनुसार समस्या सवारी साधनमा जडान गरिएको ‘इन्जिन ब्लक हिटर’ सँग सम्बन्धित छ । चिसो मौसममा इन्जिन तताउन प्रयोग हुने उक्त हिटरको एलिमेन्टमा समयसँगै दरार पर्न सक्ने र त्यसबाट कुलान्ट चुहिने जोखिम देखिएको छ । हिटरलाई बाह्य विद्युत् स्रोतमा प्लग गर्दा उक्त चुहावटले सर्ट सर्किट भई आगलागी हुन सक्ने खतरा रहेको बताइएको छ ।
कम्पनीले स्पष्ट पारेअनुसार यो जोखिम गाडी चलिरहेको अवस्थामा नभई, पार्किङ गरी हिटर प्लगमा जोडिएको अवस्थामै देखिएको हो । डिसेम्बर ३ सम्मको विवरणअनुसार फोर्ड एस्केपका कम्तीमा १२ वटा सवारी साधनमा यही कारणले आगलागी भएको उजुरी परेको छ । यद्यपि मानवीय क्षति भने नभएको जनाइएको छ ।
कुन–कुन मोडल प्रभावित ?
फोर्डले सन् २०१३ देखि २०२४ सम्म उत्पादन भएका विभिन्न मोडलहरूमा समस्या देखिएको जनाएको छ । सन् २०१९ देखि २०२४ सम्मका फोर्ड एक्सप्लोरर, सन् २०१३ देखि २०१८ सम्मका फोर्ड फोकस, २.० लिटर इन्जिन भएका सन् २०१३ देखि २०१९ सम्मका फोर्ड एस्केप तथा सन् २०१५ देखि २०१६ सम्म उत्पादन भएका लिंकन एमकेसी मोडलहरू यस रिकलमा समावेश छन् ।
ग्राहकका लागि के गर्ने ?
फोर्डले आगामी फेब्रुअरी ९ देखि प्रभावित ग्राहकहरूलाई औपचारिक सूचना पत्र पठाउने जनाएको छ । यसअघि नै ग्राहकहरूले कम्पनीको आधिकारिक वेबसाइट वा एनएचटीएसएको पोर्टलमा आफ्नो १७ अंकको भेहिकल आइडेन्टिफिकेसन नम्बर (VIN) प्रविष्ट गरी सवारी साधन जोखिममा छ कि छैन भनेर जाँच गर्न सक्नेछन् ।
कुलान्ट चुहिएको दाग देखिएमा, क्याबिनभित्र तातो हावा नआएमा, इन्जिन ओभरहिट भएको संकेत आएमा वा जलेको गन्ध महसुस भएमा तुरुन्त सावधानी अपनाउन कम्पनीले आग्रह गरेको छ ।
निःशुल्क मर्मत व्यवस्था
फोर्डले नयाँ डिजाइनको हिटर एलिमेन्ट विकास गरिरहेको जनाएको छ । आवश्यक पार्ट्स उपलब्ध भएपछि आधिकारिक डिलरमार्फत निःशुल्क मर्मत गरिनेछ । मर्मत सम्पन्न नहुन्जेलसम्म ग्राहकलाई हिटर प्लग प्रयोग नगर्न निर्देशन दिइएको छ । आवश्यकता नभएमा हिटर प्रणाली नै अस्थायी रूपमा हटाइदिने विकल्प पनि उपलब्ध गराइएको छ ।
