काठमाडौँ। चितवनको खैरहनीमा प्लान्ट स्थापना गरी ‘मत्स्य राजा’ ब्रान्डमा माछा दाना उत्पादन गर्दै आएको अन्नपूर्ण माछा दाना उद्योग लिमिटेडको व्यापारमा उत्साहजनक वृद्धि देखिएको छ। सन् २०२५ मा कम्पनीले ३९ करोड ८० लाख रुपैयाँ बराबरको कारोबार गरेको छ।
इन्फोमेरिक्स क्रेडिट रेटिङ नेपालको रिपोर्ट अनुसार, सन् २०२४ मा ७ करोड ९० लाख रुपैयाँको कारोबार गरेको कम्पनीले पहिलो पूर्ण वर्षमै आम्दानीलाई करिब पाँच गुणासम्म बढाउन सफल भएको छ।
कम्पनीको पुँजीगत संरचनामा सुधार हुँदै आएको छ। समग्र गेयरिङ रेसियो सन् २०२४ मा १.८४ गुणा रहेकोमा सन् २०२५ मा घटेर १.२१ गुणा पुगेको छ। एबिटा मार्जिन १५.१८ प्रतिशत कायम छ। क्रेडिट रेटिङ ‘आईआरएन डबल बी माइनस’ दिइएको छ, जसले मध्यम जोखिम देखाउँछ।
कम्पनीले सर्वसाधारणको लागि आईपीओ प्रक्रिया अघि बढाएको छ। कम्पनीले १०,०९,५३१ कित्ता साधारण शेयर (प्रतिकित्ता १०० रुपैयाँ) निष्काशन गर्ने तयारीमा रहेको छ। लक्ष्मी सन्राइज क्यापिटल लिमिटेडलाई निष्काशन तथा बिक्री प्रबन्धक नियुक्त गरिएको छ।
अन्नपूर्ण माछा दाना उद्योग अनुभवी प्रवर्द्धकहरूद्वारा सञ्चालित छ। ५ सदस्यीय सञ्चालक समितिको नेतृत्व अध्यक्ष निरञ्जन थापाले गरिरहेका छन्। सीईओ यश पुरी व्यवस्थापकीय अनुभवसहित कार्यरत छन्। सबैभन्दा बढी (२६%) सेयर उमेश जंग थापासँग छ।
सरकारले माछा पालन क्षेत्रमा प्राथमिकता दिएका कारण उद्योगको भविष्य उज्ज्वल देखिएको छ। तर, कच्चा पदार्थको मूल्य उतारचढाव, विदेशी मुद्रा जोखिम, वर्किङ क्यापिटल इन्टेन्सिभ प्रकृति, माछामा रोग र जलवायु परिवर्तन जस्ता चुनौतीहरू रहेका छन्।
कम्पनीको प्लान्ट प्रतिघण्टा ५ टन दाना उत्पादन क्षमता राख्दछ। आगामी दिनमा उत्पादन क्षमताको पूर्ण उपयोग र बजार प्रतिस्पर्धामा आफ्नो हिस्सा सुरक्षित गर्नु मुख्य चुनौती रहनेछ।
